|
PUO KA MOOKAMELI E MOHOLO OA LEKHOTLA LA KHOKAHANYO EA LITABA
TSA HIV LE AIDS PHANONG EA LIKOBO HO SETSI SA MOHLOLI OA BOPHELO
E TŠOARETSOENG SETSING SA MOHLOLI OA BOPHELO, HA TŠOSANE KA LA
28 MPHALANE, 2008
MOTLOTLEHI HLOOHO EA NAHA LETSIE LA BORARO,
MOHLOMPHEHI TONA-KHOLO EA ‘MUSO OA MOTLOTLEHI,
MOLULA-SETULO OA MOKHATLO OA LESOTHO OA BATHO BA NANG LE BOKOOA
BA PONO;
MOOKAMELI OA SETSI SA MOHLOLI OA BOPHELO LE BASEBETSI BOHLE BA
SONA;
BARUTOANA BA PHELANG SETSING SENA SA MOHLOLI OA BOPHELO;
BAPHATLALATSI BA LITABA BA TENG KOANO;
BO ‘M’E LE BO NTATE;
Ke motlotlo haholo hore ebe kajeno lena ke mona sebakeng sena sa
Mohloli oa Bophelo ho tla thaba ‘moho le lona haele mona setsi
sena se tla amohela mpho eo re e tlisitseng re le lekhotla la
naha la khokahanyo ea litaba tsa HIV le AIDS (National AIDS
Commission) ka har’a naha. Ke tlotla ho rona re le lekhotla lena
ha re ntse re tseba ho thusa mekhatlo e teng ka hare ho naha ena
ea Lesotho.
Har’a mesebetsi eo lekhotla la naha la khokahanyo ea litaba tsa
HIV le AIDS le jereng boikarabello ba eona, ke ho bona hore le
fana ka tšehetso ho mekhatlo e ikemetseng e le ho ntšetsa pele
maano a ‘Muso toantšong ea lefu la HIV le AIDS le sa siee morao
toantšo ea bofuma.
Ke ka hona ho sa kang hoa eba le lesisitheho ho rona ha re
fumana kopo ho tsoa ho Mohloli oa Bophelo hore re e seka-seke
hore ebe ke kae moo ho ka qotsoang hore kopo eo e arabeloe. Ke
bontše bo ‘M’e le bo Ntate hore NAC e ile ea fumana kopo ea ho
abela setsi sena likobo tse ka bang makholo a mahlano (500).
Motsamaisi oa litšebeletso,
Ke ile ka khahloa haholo ke kopo ea Mohloli oa Bophelo; e neng e
sa batle chelete, empa e kopa seo e leng tlhoko ea setsi sena.
Hangata batho kapa mekhatlo ha e batla thuso, e batla mokotla ka
kotloloho. Ke lekanya hore ha motho a na le taolo ea chelete
joale o ikutloa e le hona a filoeng matla a ho sebetsa. Athe
bothata ba chelete ke hore motho o lokela ho fana ka tlaleho ea
hore chelete e fanoeng e sebelitse joang le hore na e ne e
ipapisitse le seo kopo e se tekileng; e leng ntho eo ba bang ba
balekane ba rona tšebetsong ho leng bothata ho e etsa.
Ke na le tšepo e tiileng hore thepa ena e tla hlokomeloa e le
hore ba bang bao e leng hona ba ntseng ba tla fihla mona ba ‘ne
ba fumane seo ba robalang ka sona. Kaholimo ho tsohle, har’a
lithuto tse etsoang mona, tseo ke tsebileng hore li akha moloho
ka matsoho le mochini ‘moho le Braille, ke tšepa hore thuto ea
HIV le AIDS ha e ea salla morao. Ho bohlokoa haholo hore karolo
tsohle tsa sechaba li rue tsebo ka lefu lena le behileng Basotho
tlokotsing, ‘me batho ba nang le bokooa ba pono ha ba lokele ho
salla morao.
Hangata re bua ka pheliso ea sekhobo le khethollo ho batho ba
phelang le tšoaetso ea HIV le AIDS. Re lokela le ho loanela hore
sekhobo le khethollo li fele le ho batho ba nang le bokooa, ‘me
litokelo tsa bona li hlompshoe ka ho tšoana le tsa batho ba bang
haholo malebana le HIV le AIDS. Ke lumela hore joalo ka bohle,
le bona ba ntse ba angoa ke lefu lena ka mekhoa eohle eo le
amang batho ka eona. Ka hona ke ipiletsa hore le se salle morao.
Ithukhubetseng le lona ho etsa mesebetsi e menyane e kenyang
chelete e le hore le pheme bofuma bona bo jeleng setsi.
Motsamaisi oa litšebeletso tsa kajeno,
Ha ke le mothating ona ke lakatsa ho re ke motlotlo haholo ho
abela setsi sena sa Mohloli oa Bophelo likobo tsena. Mosotho o
ee a re:”Sejo senyane ha se fete molomo”.
Kea leboha.
Khotso! Pula! Nala!
|
